Golis News

Wasiirka Wasaaradda Beeraha Md. Aadan Axmed Cilmi (Dhool-yare) ayaa markii u horeysay ka warbixiyey dhibaatada uu Ayaxu ku hayo Somaliland, oo dhawaan ka dilaacay dalka.

Shir jaraa'id oo uu wasiirku shalay ku qabtay xafiiskiisa waxa uu ku sheegay in Ayax badani ku habsaday deegaano ka mid ah Gobolada Hargeysa iyo Awdal iyo Sanaag, taasoo waxyeelo weyn u geystay dalagyada beeraha iyo dhul daaqsimeediiba, waxana uu xusay wasaaradiisu xil weyn iska saartay sidii loo cidhibtiri lahaa ayaxaasi, isagoo dadweynaha kula dardaarmay inay wasaarada warbixin ka soo siiyaan goobaha ay ku sugan tahay koron-korodu.

Ugu horeyn wasiirku waxa uu sharaxaad ka bixiyey dhibaatooyinka uu ayaxu gaadhsiiyey deegaanada uu ku habsaday, waxana uu hadalkiisa ku bilaabay:-"Beryahan dambe waxa jira dhibaatooyin fara badan oo ayaxu geysto, sidaad ka war haysaan Ayaxu wuxuu fara baas ku hayaa dalkeena, iyo wadamo aynu jaar nahay, waxanu balan qaadnay in diyaaradii Ayaxa buufinaysay ay imanayso, diyaaradii wey timi dhulkii wey buufisay,dhulka waa lagala dagaalamay ayaxa".

Wasiirku waxa uu sheegay in xubno ka mid ah shaqaalaha wasaarada ay dalka Jabuuti ku soo qaateen tabobar la xidhiidha qaabka loola tacaalo ayaxa, waxa uu tilmaamay in shaqaalaha wasaarada beeraha oo kaashanaya hay'daha caalamiga ay toddobaadyadii u dambeeyey kormeer ku sameeyeen qaar ka mid ah gobolada iyo degmooyinka dalka si loo dabar gooyo ayaxaasi, waxana uu tilmaamay in meelihii loo cayimay ay diyaaradu buufisay, balse jiraan meelo kale oo aan waxba laga qaban, kuwaasna ay dhakhso diyaaradu u buufin doonto, waxanu beeralayda u soo jeediyey inay wasaarada kala shaqeeyaan dedaalka ay ugu jirto baabiinta ayaxa.

Wasiirku mar uu ka hadlayey Degmada Daara-Salaam oo qeylo dhaani ka soo yeedhay, sababta ay isuduwe ugu sameyn waayeen, waxa yidhi: "Daara-salaam degmo maaha, maaha inuu noo joogo wakiil, waa xaafad hargeysa ka tirsan, isuduwaga ayaa taga iyo shaqaalaha wasaarada, sida aanu u tango axmed dhagax iyo xaafadaha kale uun bay la mid tahay".

Dr. Cabdirisaaq Cali Ayaanle oo ah khabiir aqoon durugsan u leh arrimaha ayaxa, ahna xidhiidhiya hay'adda FAO ee wasaarada ayaa isaguna si qoto dheer uga waramay dhibaatada uu ayaxu geysto saraca iyo iyo dhul-daaqsimeedka iyo sida loogu baahan yahay in wadajir la iskaga kaashado sidii wax looga qaban lahaa, waxana uu sheegay inaanay dawladu keligeed waxba qaban Karin aaafada Ayaxa.

Dr. Cabdirisaaq waxa uu sheegay in ayaxu xiliga xagaaga ka dilaaco dhulka oogada, xiliga gugana uu ka dhasho xeebaha waxana uu geyiga Somaliland ku tilmaamay ka ugu sahlan ayaxu ka dilaaci karo, isagoo kan wakhtiga ku baahay beeralayda ku sababeeyey cimilada wanaagsan iyo roobab kala duwan ee dalka ka da'ay.

Ayax aad u tiro badan ayaa ku habsaday deegaano ka mid ah gobolada Awdal iyo Maroodi-Jeex, kaasoo xaalufiyay dalagii iyo daaqii ka soo baxay qaar ka mid ah beeraha deegaankaasi, waxanay beeraydu ma muujiyeen walaac xoog leh, qaar ka mid ah beerayda ayaa ku eedeeyey xukuumada inay ka gaabisay wax ka qabashada ayaxaasi.