Xaasha'e shacabka Somaliland sacabka uma tumin xasuuqa Soomaalida ay walaalaha yihiin, Tafatirka guud ee Golisnews
 Madaxweynaha Somaliland Daahir Riyaale Kaahin ayaa dhawaan ka soo noqday xarunta Itoobiya ee Addiss Ababa oo uu booqasho laba casho ku joogey isaga oo halkaas kula kulmay Ra'iisul wasaare Meles Zenawi.
Waxaa hadaba ka mid ahaa hadaladii oo sheegay intii uu ku guda jirey booqashadiisa in shacabka Somaliland sacabka u tumayey hawlgalladii Itoobiya ka wadey Gudaha Soomaaliya oo laga dheregsanyahay waxa naf iyo maalba ku burburay, hadaladaasi oo uu ka sheegay wareysi gaar ah oo uu siiyay Telefishanka wadanka Itoobiya. hadaba waxaa dad badani isweydiinayaa waa ayo shacabka uu ka hadlayo ee sacabka Itoobiya u tumayey dagaaladaas ay la gashay Maxkamadaha Islaamiga ah oo weli ka socda qaybo ka socda Koonfurta Soomaliya. Alleylehe tanina waa hadal af ka weyn, ayaan darro iyo magac xumo ku dheeraad ah Geyiga, mar hadii hogaan ummad ka tirsan qowmiyada Soomalidu ku andacoonayo in shacabkeedu sacabka u tumayey shiigaas xaqdarada lagu daadinayo oo hada ay cadahay in laga soo abaabuley meelo xitaa Itoobiya ka sii durugsan, oo dhacdadan ka dhigaysa denbi caakami ah oo laga galay xuquuqda insaanka. Waxaa ku haboon in qoraalkan kooban lagu sheego dhacdo aad uga fog dareenka uu madaxweyne Riyaale sheegay uu ku saabsan hooyo dhawaan soo booqatay xaafad ay deris yihiin oo loo soo dhigay koob shaah ah, ka dibna tidhi, " Hooyo iga qaad oomatoba igama degin sidii aan u arkay taangiga Itoobiya oo Muqdisho dhex gur guuranayee". hooyadaas oo aan wax waxbarasho ah lahayni, waxa ay garatay in xaqdaro iyo colaad guun ahi meesha ka socoto.Alleylehe hooyadaas iyo Riyaalena kala war la'.
Waxaa la soo gaadhey xilligii wax la iska weydiin lahaa halka lagu wado masiirka Umaadda Somaliland, mar hadii ay cadahay in aan lagu hallayn karin kooxdan ay kala irdhoobeen shacabkoodii. waxaa cad in Somaliland tahay meesha keli ah ee aan lagu qabsan qori caaradii, laakiin loola macaamilo sidii ummad la haysto oo kale, cidina aanay waxba weydiin aqoonyahan, waxagarad iyo intii lahayd talada Somaliland. Mucaarad iyo muxaafid waxaa muuqata in aan cidna talo gacanta ugu jirin, cidina ogayn waxa qorshe yahay, loona baahanyahay in arrimahan laga tashado.
Waxaanu ka raaligelinaynaa dhammaan qowmiyada Soomaaliyeed iyo guud ahaan muslimiinta hadalaadaas aan loo meel deyin ee ka soo yeedhay hogaanka Somaliland-ba ku hungowdey. waxaanu sidoo kale leenahay , " Xaasha Somaliland marnaba raali kama ahayn dhiiga lagu daadinayo xaqdarada ee shacabka Soomaaliyeed.
Abokor I Xasan
Tifatirka guud Golisnews, London
|
