Madaxwaynaha JSL waxaa uu waftiga uga waramay talaabooyinkii horu marka ahaa ee JSL ay ka qaaday dhinacyo badan gaar ahaan geedi socodka nidaamka dimuqraadiyada, Madaxwaynuhu waxa uu ku hambalyeeyay umada reer Gaana talaabooyinka wax ku oolka ah ee wadankoodu ka qaatay sugida nabad galyada iyo xasaloonida wadamo badan oo aduunka ah gaar ahaan Qaarada Africa waxana Madaxwaynuhu uu tibaaxay in kaalinta Gaana ay ka ciyaarto nabada iyo midnimada Africa ay tahay mid soo jireen ah oo ku xidhiidhsan kaalintii Nakruuma uu ka qaatay xornimada iyo gobonimadoonka qaarada Africa.

Madaxwaynuhu waxa kale uu cadeyay in dowlada iyo shacbiga Somaliland ay aad ugu riyaqeen hadaladii dhiiri galinta ahaa ee uu hogaamiyaha waftigu ka jeediyay warbaahinta maalintii dabaal daga 18May. Madaxwaynuhu wuxuu waftiga u sheegay inuu si wayn u rajaynayo in waftigu ay gaadhsin doonaan Barlamanka reer Gaana iyo shirarka madaxda Africa ee dalkooda ka dhici doonaba wax yaabaha dhabta ah ee ay indhahooda ku soo arkeen intii ay jogeen Somaliland taas oo keeni doonta in wadamada Africa ay noqon donaan kuwa iyagu u horseeda Aqoonsiga Qaranimada Somaliland.

Madaxwaynuhu mar uu ka hadlayay gooni isku taaga JSL waxa uu yidhi gooni isku taga Somaliland waa mid ka soo ga ay umada reer Somaliland ka dib markii ay aayo xumi iyo guul daro ay kala kulmeen sodonkii sane ee udanbeyay markii ay dowlad nimada la wadaageen wadankii lays ku odhan jiray Somalia.

Hogaamiyaha Waftiga Baarlamanka reer Gaana Mr. ADUSA oo isna halkaa hadal kooban ka jeediyay waxa uu sheegay in ay aad ugu faraxsan yihiin sida diiran ee loosoo dhaweyay intii ay jogeen Somaliland iyagoo dareensanaa in ay dalkoodii oo kale jogaan.

Mr Adusa waxaa kale oo uu intaas ku daray iyagoon hore u aqoon Somaliland in ay manta usuuro gashay in ay bartaan shacbiga iyo dalka Somaliland dadaalka wayn ee ay u galeen nabada iyo horumarka dalkooda taas oo ay gadhsin donaan intii dadaalkooda ah Dalkooda Jamhuuriyada Gaana"